一別十年

　早幾日send咗個賀年email俾日本三重嘅一個日文老師 - あゆみ先生(亞由美老師)，今日收到佢嘅電郵回覆，而且仲attach咗幾幅「家族写真」（即係Family Photo）俾我睇。仲記得當年認識あゆみ先生已經係96,97年嘅事，當年佢跟咗老公嚟到香港生活，佢對仔女都仲係好細。今次睇返佢啲家庭照，阿仔航大郎已經18歲，而細女夢步亦都15歲等緊升高中。只可以概嘆時間快逝。

　當年佢離開香港時，我同一班日文班嘅同學去送機，當時仲係講緊喺啟德機場度坐飛機。後來我去名古屋嘅時候，抽咗時間去過三重縣果面探佢～佢仲好好咁車咗我去伊勢度參拜神宮添~ 嚟緊佢地3月會過嚟HK幾日，到時就可以再重聚，上次一別，原來已經係10年前...... 雖然咁耐冇見，但人情猶在，還是要好好招待他們一家。