棒棒堂精神

自己一向都有keep住睇台灣《模范棒棒堂》依個節目，最後知道依個節目過咗三年之後，終於去到結束嘅一日。如果只喺留意平時娛樂新聞嘅話，一般人可能只會覺得棒棒堂裡面只係成班發明星夢嘅死靚仔。不過開採至今都睇咗好一段長日子嘅我，覺得其實整個節目，的確是一個有Heart，同埋有用心去整作嘅節目，因為裡面為年輕人帶嚟咗好多正面嘅訊息。

依個節目可以話係一個俾年青人逐夢嘅舞台。最吸引自己去睇嘅最大原因，除咗因為自己一向都鍾意睇充滿青春氣息嘅節目之外，當中最鍾意嘅係一個經歷三年嘅節目裡面，睇到一班好多嘢都唔掂嘅死o靚仔，為咗追逐自己嘅夢想，喺同一個舞台上不斷進步，增值同挑戰自己。果一種「拼出去」的氣魄，喺香港又有幾多年青人可以做到?!

播咗三年，自己都睇咗兩年幾，都算係睇住佢地新舊交替，不斷求變、突破。或者台灣嘅電視節目嘅一個好大嘅特別係，比香港節目嚟講情緒流露得比較真。當然作為電視節目，有些位係堆砌出嚟，但亦都有一啲真情流露嘅位，正正就係感動到觀眾一直去支持依個節目嘅原因。

正如主持人范瑋琪所講，棒棒堂嘅果種逐夢的拼勁已經成為咗一種精神，浸入咗好多年青人嘅心裡面 ─ 面對自己嘅夢想，就向著目標拼出去。或者係別人眼中，一個人自己嘅夢想係幾咁可笑都好，只要果個人自己一心一意，全力去完成自己嘅夢想，依種精神絕對係值得尊敬，正如日劇《Rookies》裡面嘅川藤老師亦都講，「不可嘲笑別人的夢想」。或者棒棒堂精神，就係依種大無畏嘅逐夢精神。

若果能夠有更多依啲浸透正面思想嘅節目就好喇，總比「大咭窿」依類節目好睇好多。